Librat jashtëshkollorë, prindërit hasen me përmbajtje të papërshtatshme, mungojnë kontrollet

Mes literaturave për fëmijë të përshtatshme për mosha të caktuara gjenden edhe libra për të cilat prindërit kanë rezerva.

Edukimi i fëmijëve për tema qoftë edhe seksuale sipas psikologëve është i nevojshëm, por mosha është ajo që duhet të kihet kujdes.

Kjo pasi marrja e informacioneve para kohe i shtyn ata të ndërmarrin veprime që nuk janë të këshillueshme për moshën .

“Nëse një fëmijë haset me një libër me përmbajtje sensuale, ose diçka që lidhet me elementë të lidhjeve, që ndoshta  ai nuk i përjeton në ato momente mund të ketë interesin edhe imagjinatën, që ai të ketë një lidhje të tillë”, tha psikologia, znj. Lenida Halilaj

Nga ana tjetër kryetari i Shoqatës së botuesve shqiptarë na tregon se nuk ka kontrolle nëse libra të caktuar janë apo jo të përshtatshëm.

“Nuk ka filtra për shtëpitë botuese. Filtri për shtëpitë botuese është lexuesi, lexuesi nuk duhet të marrë libra jo të mirë”- theksoi z.Petrit Ymeri, Kryetar i Shoqatës së Botuesve Shqiptarë.

Kryetari i shoqatës së botuesve shqiptarë e sheh këtë shqetësim tek pakësimi i vëmendjes ndaj kulturës dhe librit.

“Mungon ai orientim që në radhë të parë duhet të jenë mësuesit që ia japin nxënësit, sidomos në një situatë kur shumë familje janë të preokupuar për probleme të mbijetesës”, u shpreh z. Ymeri.

Gjendur përballë këtyre situatave, prindërit, mësuesit, shtëpitë botuese dhe institucionet duhet të tregohen më të vëmendshëm.