Berisha: Rama ka firmosur një vendim për të marrë çdo kompetencë të qeverisë vendore

Ish-kryeministri Sali Berisha ka thënë se kreu i qeverisë, Edi Rama, ka firmosur një vendim për të marrë çdo kompetencë të qeverisë vendore.

Komentet Berisha i bëri gjatë fjalës para mbështetësve të mbledhur poshtë banesës së tij, ku ai vuan dënimin me ‘arrest shtëpie’ për korrupsion.

Berisha tha gjithashtu se Rama do 30-përqindëshin për çdo ndërtim që kryhet në të gjithë vendin.

Pjesë nga fjala e Berishës:

Miqtë e mi, gjithçka ky regjim bën për të mbuluar krimet e shëmtuara që kryen, Edi Rama ka firmosur një vendim për të shkelmuar për të satën e satën herë Kushtetutën.

Merr çdo kompetencë të qeverisë vendore, ne një kohë kur urbanistika, lejet e ndërtimit janë të gjitha atribute të qeverisë vendore në përputhje me Kushtetutën, në përputhje me Kartën e Kongresit të Autonomisë Lokale dhe Rajonale të Europës.

Por makutëria e tij, pangopësia e tij nuk ka kufi.

Ai do 30-përqindëshin për çdo ndërtim, kudo që kryhet në të katër anët e vendit.

Nga kullat, monumente të shëmtuara të drogës dhe korrupsionit dhe tek shtëpitë që ndërtohen me mundin dhe djersën e qytetarëve.

Ndaj dhe ftesa është për çdo qytetar, të ngrihemi në këmbë kundër këtij regjimi antishqiptar.

Kundër këtij regjimi që po vjedh, varfëron dhe mjeron çdo ditë qytetarët e këtij vendi.

LEXONI GJITHASHTU:

• Berisha zbulon 2 taksat që do të hiqen të parat nëse PD vjen në pushtet
• Avokati nga Britania: Si dështuan 2 përpjekjet e Berishës për heqjen e “non-gratës”