Berisha nga Fieri: PD do t’i rikthejë Shqipërisë të rinjtë dhe të ardhmen e saj

Kreu i Partisë Demokratike, Sali Berisha, zhvilloi këtë të dielë takimin përmbyllës elektoral me qytetarët e Fierit, ku prezantoi pikat kryesore të programit të PD-së dhe bëri thirrje për mobilizim masiv në ditët e mbetura deri në zgjedhje.

Berisha e cilësoi fitoren e mundshme të opozitës si “fitorja më madhështore”, duke theksuar se ajo u përket të gjithë shqiptarëve që besojnë në liri, dinjitet dhe vlerat e familjes.

Në fjalën e tij, ai nënvizoi se programi i PD-së synon rritjen e pensionit minimal në 200 euro, rrogës minimale në 500 euro, si dhe miratimin e statusit për minatorët.

Sipas tij, ky është një program që bashkon shqiptarët në përmirësimin e jetës sociale dhe ekonomike: nga mirëqenia, punësimi dhe shëndetësia, te arsimi dhe mundësitë për të rinjtë.

“Kombi ka humbur rininë, kemi lindshmërinë më të ulët në botë. 600 mijë të rinj janë larguar në 10 vite. Ne duhet të bëjmë çdo gjë për të rikthyer të ardhmen e këtij vendi”, deklaroi Berisha.

Ai premtoi mbështetje për të rinjtë përmes 5 viteve pa taksa për bizneset, kredi të buta për strehim dhe aktivitete ekonomike, dyfishim të buxhetit për arsimin, eliminim të pengesave për universitetin, dhe një grant prej 30 mijë eurosh për çiftet e reja.

“Ëndrra e tyre është e ardhmja e Shqipërisë. Kombit i kemi borxh rininë dhe asgjë nuk do të na ndalojë pa e kthyer atë në vendin e vet”, përfundoi Berisha.

LEXONI GJITHASHTU:

• Rama nga Saranda: Partitë e reja, cikli i dytë i së ndjerës LSI, mos ujisni…
• Berisha në Peqin: Me PD-në nuk do ketë rroga nën 500 euro dhe pensione nën 200 euro