U arrestuan në Lalëz, gjykata jep masat e sigurisë për Xhevdet Plakun e 6 të tjerët

Gjykata e Durrës ka dhënë këtë të dielë masat e sigurisë për shtatë personat e arrestuar gjatë një operacioni të forcave speciale në zonën e Gjirit të Lalzit, dy ditë më parë.

Pas shqyrtimit të provave dhe kërkesës së prokurorisë, trupa gjykuese vendosi masën “arrest me burg” për Xhevdet Plakun, i njohur ndryshe si ‘Akili’, i cili rezulton të jetë arratisur nga një burg në Itali në janar të këtij viti.

Në të njëjtën masë sigurie u lanë edhe shtetasit Flobenc Meçja, Voltan Xhani, Jugert Xhani, Fatjon Qesja dhe Ortion Hasani.

Ndërkohë, për shtetasin Alfred Hasanaj, gjykata caktoi masën më të lehtë “detyrim paraqitje”. Ai është i detyruar të paraqitet çdo të hënë në orën 10:00 pranë Policisë Gjyqësore dhe i ndalohet dalja jashtë shtetit pa lejen e gjykatës, ndërkohë që pasaporta e tij është sekuestruar.

Operacioni i arrestimeve u zhvillua në një lokal luksoz në zonën e Gjirit të Lalzit, si pjesë e një hetimi në vijim ndaj veprimtarisë së dyshuar kriminale të personave të përfshirë.

Pranë Gjykatës së Shkallës së Parë të Juridiksionit të Përgjithshëm Durrës në datë 24.05.2025 është regjistruar çështja penale me Nr. 335 Akti, me objekt “Vleftësimin e ligjshëm të arrestit në flagrancë të personave nën hetim dhe caktimin e masës së sigurimit personal ndaj shtetasve Xh.P, F.M, V.Xh, J.Xh, O.H, A.H. F.Q”.

Kjo çështje u gjykua nga Gjyqtari i gatshëm Z. Sokol Mara.
Seanca gjyqësore u zhvillua në datë 25.05.2025

Në përfundim të shqyrtimit gjyqësor, për çështjen e sipërcituar, Gjykata e Shkallës së Parë e Juridiksionit të Përgjithshëm Durrës ka disponuar me Vendimin Nr. 355, datë 25.05.2025, ku shkurtimisht

Vendimi i plotë

1. Vleftësimin e ligjshëm të arrestit në flagrancë të personit nën hetim Xh.P, i dyshuar për kryerjen e veprave penale “mbajtja pa leje dhe prodhimi i armëve, armëve shpërthyese dhe i municionit” dhe “mos kallëzimi i krimit”, të parashikuara përkatësisht nga neni 278, prg.1, prg.3, dhe neni 300 i Kodit Penal të Republikës së Shqipërisë.
2. Caktimin ndaj personit nën hetim Xh.P, të masës së sigurimit personal “arrest në burg”, të parashikuar në nenin 238 të Kodit të Procedurës Penale të Republikës së Shqipërisë.
3. Vleftësimin e ligjshëm të arrestit në flagrancë të personit nën hetim F.M, i dyshuar për kryerjen e veprës penale “mbajtja pa leje dhe prodhimi i armëve, armëve shpërthyese dhe i municionit”, “mos kallëzimi i krimit”, dhe “falsifikimi i letërnjoftimeve, i pasaportave ose i vizave”, të parashikuara përkatësisht nga neni 278, prg.1, prg.3, neni 300, dhe neni 189, prg.1, i Kodit Penal të Republikës së Shqipërisë.
4. Caktimin ndaj personit nën hetim F.M, të masës së sigurimit personal “arrest në burg”, të parashikuar në nenin 238 të Kodit të Procedurës Penale të Republikës së Shqipërisë.
5. Vleftësimin e ligjshëm të arrestit në flagrancë të personit nën hetim V.Xh, i dyshuar për kryerjen e veprave penale “mbajtja pa leje dhe prodhimi i armëve, armëve shpërthyese dhe i municionit” dhe “mos kallëzimi i krimit”, të parashikuara përkatësisht nga neni 278, prg.1, prg.3, dhe neni 300 i Kodit Penal të Republikës së Shqipërisë.
6. Caktimin ndaj personit nën hetim V.Xh, të masës së sigurimit personal “arrest në burg”, të parashikuar në nenin 238 të Kodit të Procedurës Penale të Republikës së Shqipërisë.
7. Vleftësimin e ligjshëm të arrestit në flagrancë të personit nën hetim J.Xh, i dyshuar për kryerjen e veprave penale “mbajtja pa leje dhe prodhimi i armëve, armëve shpërthyese dhe i municionit” dhe “mos kallëzimi i krimit”, të parashikuara përkatësisht nga neni 278, prg.1, prg.3, dhe neni 300 i Kodit Penal të Republikës së Shqipërisë.
8. Caktimin ndaj personit nën hetim J.Xh, të masës së sigurimit personal “arrest në burg”, të parashikuar në nenin 238 të Kodit të Procedurës Penale të Republikës së Shqipërisë.
9. Vleftësimin e ligjshëm të arrestit në flagrancë të personit nën hetim O.H, i dyshuar për kryerjen e veprës penale “mos kallëzimi i krimit”, të parashikuara nga neni 300 i Kodit Penal të Republikës së Shqipërisë.
10. Caktimin ndaj personit nën hetim O.H, të masës së sigurimit personal “arrest në burg”, të parashikuar në nenin 238 të Kodit të Procedurës Penale të Republikës së Shqipërisë.
11. Vleftësimin e ligjshëm të arrestit në flagrancë të personit nën hetim A.H, i dyshuar për kryerjen e veprës penale “mos kallëzimi i krimit”, të parashikuara nga neni 300 i Kodit Penal të Republikës së Shqipërisë.
12. Caktimin ndaj personit nën hetim A.H, të masave të sigurimit personal “detyrim për tu paraqitur në policinë gjyqësore” dhe “ndalimi i daljes jashtë shtetit”, të parashikuara respektivisht nga neni 234 dhe 233 i Kodit të Procedurës Penale të Republikës së Shqipërisë.
13. Urdhërohet e personi nën hetim A.H, të paraqitet para shërbimeve të policisë gjyqësore të Prokurorisë pranë Gjykatës së Shkallës së Parë të Juridiksionit të Përgjithshëm Durrës, çdo të hënë, ora 10:00.
14. Urdhërohet personi nën hetim A.H, të mos largohet nga territori i Republikës së Shqipërisë, pa autorizimin e Gjykatës. Urdhërohet Prokuroria pranë Gjykatës së Shkallës së Parë të Juridiksionit të Përgjithshëm Durrës, që në funksion të zbatimit të këtij vendimi të sekuestrojë pasaportën apo dokumentet e tjera identifikuese të shtetasit A. H., të vlefshme për daljen jashtë shtetit.
15. Urdhërohet lirimi i menjëhershëm i personit nën hetim A.H, nëse në ngarkim të tij nuk ekziston ndonjë masë tjetër sigurimi personal me karakter shtrëngues, arrest në burg, dhe/ose ndonjë vendim penal dënimi me burgim, i formës së prerë.
16. Vleftësimin e ligjshëm të arrestit në flagrancë të personit nën hetim F.Q, i dyshuar për kryerjen e veprave penale “përkrahja e autorit të krimit” dhe “mos kallëzimi i krimit”, të parashikuara përkatësisht nga neni 302, dhe neni 300, i Kodit Penal të Republikës së Shqipërisë.
17. Caktimin ndaj personit nën hetim F.Q, të masës së sigurimit personal “arrest në burg”, të parashikuar në nenin 238 të Kodit të Procedurës Penale të Republikës së Shqipërisë.
18. Për ekzekutimin e këtij vendimi ngarkohet Prokuroria pranë Gjykatës së Shkallës së Parë të Juridiksionit të Përgjithshëm Durrës, në bashkëpunim me shërbimet e policisë gjyqësore.
19. Kundër këtij vendimi mund të bëhet ankim në Gjykatën e Apelit të Juridiksionit të Përgjithshëm, brenda 5 (pesë) ditëve, duke filluar ky afat nga dita e nesërme e komunikimit të vendimit të arsyetuar të gjykatës.
Gjykata e Shkallës së Parë e Juridiksionit të Përgjithshëm Durrës, shpreh gatishmërinë maksimale në kuadër të bashkëpunimit me Median, si dhe mbetemi të gatshëm për çdo sqarim apo eventualitet të mundshëm.

Gjykata e Shkallës së Parë e Juridiksionit të Përgjithshëm Durrës

Personat e arrestuar nga opercioni i Policisë së Durrësit dhe Forcave Speciale:

• Xhevdet Plaku, 45 vjeç, banues në Durrës. I shpallur në kërkim ndërkombëtar nga Interpol Roma, pas urdhrit të Gjykatës së Breshias (Itali) për veprën penale “Trafikimi i narkotikëve”. Plaku ishte arratisur nga burgu i Ankonës në janar 2025. Gjatë kontrollit, iu gjet një armë zjarri tip pistoletë me fishek në fole, gati për qitje.
• Flobens Mecia, alias “Gega”, alias “Drini”, 43 vjeç, banues në Shkodër. I kërkuar nga SPAK dhe me masë sigurie “Arrest në burg” për veprat penale “Organizata kriminale”, “Kryerja e veprave penale nga grupi i strukturuar kriminal” dhe “Sigurimi i kushteve për të kryer vrasje”. Gjatë kontrollit iu gjetën dy dokumente të falsifikuara dhe një armë zjarri pistoletë me fishek në fole.
• Voltan Xhani, 39 vjeç, lindur në Përmet dhe rezident në Holandë. I shpallur në kërkim për “Trafikim mjetesh motorike” dhe “Sigurimi i kushteve për të kryer vrasje”, lidhur me një hetim për vrasje me armë zjarri në Shkodër. Iu gjet një armë zjarri pistoletë me fishek në fole në çantën personale.
• Jugert Xhani, 35 vjeç, lindur në Përmet. Akuzohet për “Prodhimi dhe mbajtja pa leje e armëve luftarake dhe municionit”, “Moskallëzimi i krimit” dhe “Përkrahja e autorit të krimit”. Iu sekuestrua një armë zjarri pistoletë dhe municion luftarak.
• O. H., 38 vjeç, banues në Mamurras – nën hetim për “Moskallëzim krimi” dhe “Përkrahja e autorit të krimit”.
• F. Q., 36 vjeç, banues në Tiranë – nën hetim për të njëjtat vepra penale.
• A. H., 45 vjeç, banues në Mamurras – i dyshuar për “Moskallëzim krimi” dhe “Përkrahja e autorit të krimit”.

LEXONI GJITHASHTU:

• Duke ngrënë krudo në resortin luksoz, momenti i arrestimit të të “fortëve” në Lalëz
• “Enigma”, të arrestuarit mbërrijnë në gjykatën e Durrësit nën masa të larta sigurie
• Kush janë të “fortët” e arrestuar në restorantin në Lalëz, detaje nga operacioni
• U arratis nga burgu në Itali, RENEA arreston të shumëkërkuarin Xhevdet Plaku