Ambasadorja e Izraelit: Hamasi nuk dëshiron paqe, ai solli luftën në Gaza

Në një intervistë ekskluzive për Euronews Albania, ambasadorja e Izraelit në Shqipëri, Galit Peleg, komentoi planin e paqes për Gazën dhe situatën e tensionuar mes Izraelit dhe Hamasit.

Peleg u shpreh se e vetmja gjë që do Hamasi është të vrasë hebrenj dhe izraelitë, duke mos dëshiruar të gjejnë zgjidhje apo të promovojnë të ardhmen e njerëzve të tij.

“Nëse ata tregojnë vullnet për t’u bashkuar këtij plani, atëherë ka një të ardhme për njerëzit e tyre,” tha ajo.

I pyetur nga moderatori Thimi Samarxhiu nëse Izraeli duhet të kërkojë ndjesë për vrasjen e fëmijëve dhe grave në Gaza, ambasadorja theksoi se “ndjesë është lufta” dhe se Izraeli nuk kishte plan të vriste gra dhe fëmijë.

“Ne nuk kemi bërë ndonjë veprim për të reaguar dhe vepruar ndaj masakrës së tmerrshme. Hamasi bëri gabimin e madh, nuk mbrojti njerëzit e tij pasi e dinte që Izraeli do të reagonte,” shtoi ajo.

Situata në Izrael, sipas Peleg, mbetet e rëndë dhe shkaktuar nga vetë Hamasi. “Lideri i Hamasit e ka deklaruar në të gjitha platformat se qytetet dhe tunelët janë për t’u luftuar, nuk janë për mbrojtje dhe i kanë përdorur ato si mburojë njerëzore, e më pas akuzojnë se civilët po vriten,” u shpreh ajo.

Për viktimat civile, ambasadorja theksoi:

“Ne kemi dënuar çdo rast ku civilët janë vrarë dhe kjo është një luftë që ne nuk e kërkuam, por është një luftë e detyruar. Është e dhimbshme që disa civilë ranë, por të kërkojmë ndjesë, jo.” Ajo vijoi: “Izraeli po përdor praktika që askush nuk i pret, dhe në luftë njerëzit vriten, një gjë për të ardhur keq.”- u shpreh amasadorja.

Peleg akuzoi Hamasin për nisjen e konfliktit: “Njerëzit në Gaza janë vrarë sepse qeveria e zgjedhur zgjodhi të shkojë në Izrael dhe të vrasi civilë, ndaj po ndodh kjo luftë.”

Sipas saj, “Izraeli nuk ka pse të kërkojë ndjesë, sepse lufton për sigurinë e civilëve të vet.”

Në përfundim, ambasadorja theksoi se “Hamasi duhet t’u kërkojë ndjesë palestinezëve në Gaza, pasi sollën këtë luftë në ta, sepse refuzojnë të mbrojnë civilët, përdorin civilët si mburojë dhe akuzojnë ndihmën humanitare për qëllimet e tyre.”

LEXONI GJITHASHTU:

• Autobusi urban bie në gropat e kantierit të rrugës në Vlorë
• Dëshmimtari në Hagë: Thaçi kishte marrëdhënie të ndërlikuara me komandantët e UÇK-së