Arrestohen në Itali dy vëllezërit shqiptarë, pritet ekstradimi në Shqipëri

Dy vëllezër shqiptarë janë arrestuar në Itali dhe pritet të ekstradohen në Shqipëri, si pjesë e një operacioni ndërkombëtar të titulluar “The Wanted”. Arrestimi i tyre u bë i mundur falë bashkëpunimit mes Policisë së Shtetit dhe autoriteteve italiane.

Njëri prej të arrestuarve, shtetasi E. H., 35 vjeç, ishte shpallur në kërkim nga Gjykata e Durrësit për vjedhje me dhunë dhe përkrahje të autorit të krimit. Ai akuzohet se ka vjedhur një automjet, një shumë parash dhe një celular në një fabrikë qumështi në vitin 2021 dhe ka ndihmuar një person tjetër të shpallur në kërkim.

Vëllai i vogël, shtetasi K. H., 31 vjeç, rezulton i dënuar nga Gjykata e Dibrës me 4 vite e 4 muaj burg për kultivim të bimëve narkotike.

Ai u kap në flagrancë në vitin 2019 duke kultivuar mbi 1,300 fidanë narkotikë brenda një sere në Martanesh dhe i ka mbetur për të vuajtur një pjesë e dënimit.

Interpol Tirana dhe Interpol Roma po kryejnë procedurat për ekstradimin e dy vëllezërve drejt Shqipërisë, ndërkohë që operacioni nënvizon bashkëpunimin efektiv ndërkombëtar për kapjen e personave në kërkim.

LEXONI GJITHASHTU:

• Nxjerr kallashnikovin dhe qëlllon makinën në kryqëzim, pamjet e ngjarjes në Kombinat
• Qëlluan me kallashnikov në mes të kryqëzimit në Kombinat, kush janë të arrestuarit