Berisha paralajmëron shkrirjen e SPAK: Jashtë kontrollit, do e shuajmë me çdo kusht

Kryedemokrati Sali Berisha ka paralajmëruar shkrirjen e Prokurorisë së Posaçme nëse Partia Demokratike vjen në pushtet. Deklaratat Berisha i bëri gjatë një tubimi të mbajtur përpara SPAK, ku ai u paraqit në kuadër të masës së sigurisë të vendosur nga GJKKO.

Berisha tha se Prokuroria e Posaçme do të mbyllet me çdo kusht, pasi është një institucion që është jashtë çdo kontrolli.

“Të njëjtin fat do të kenë edhe bandat dhe prokurorët që janë të lidhur me to. Absolutisht ky institucion nuk do të ekzistojë. Unë ndjej keqardhje që është rrëmbyer nga momentet, por një institucion që është jashtë çdo kontrolli është një institucion që duhet të shuhet me çdo kusht. Së pari, ky institucion nuk mund të kontrollonte kurrë gjykatësit. Që në momentin që kontrollon telefonat e gjykatësve specialë, ke krijuar një drejtësi që as Enveri dhe Hitleri nuk e kanë pasur. Si mund t’i japësh prokurorit kontrollin mbi gjykatësit tek të cilët çon dosjen? Merre fund që këtu, kaq. Ju, njerëz të medias, duhet ta denonconi këtë në mënyrën më të fuqishme,” tha Berisha.

Kryedemokrati paralajmëroi se, nëse PD fiton zgjedhjet, “prokurorët që flenë mbi dosjet e krimit do të trajtohen si kriminelë”.

“Nuk janë pseudo-policët që më udhëheqin mua. Ata që flenë mbi krimin, ata duhet të hetohen si kriminelë. Me këtë nuk nënkuptoj çdo punonjës të këtij institucioni, pasi ka prej tyre që zbatojnë ligjin dhe do të mbeten të nderuar,” përfundoi Berisha.

LEXONI GJITHASHTU:

• Berisha paralajmëron kundërprotestë në mbrojtje të SPAK, mesazh për kryeministrin
• SPAK kërkesë policisë: Pse nuk u mor asnjë masë sigurie gjatë gjyqit ndaj Veliajt?