Dhjetë ditë grevë, arsimtarët në RMV kërkojnë rritje pagash

Nëpër shkollat e Maqedonisë së Veriut klasat janë bosh në ditën e dhjetë të grevës së përgjithshme të arsimit.

Profesori i gjimnazit Zenafer Bajmak mbylli klasën e tij për sot pasi nuk ka nxënës dhe refuzon të punojë derisa të ndjehet i vlerësuar dhe me pagën e merituar.

“Nuk është korrekte që disa ministra ti nënçmojnë mësuesit sepse ka mësues që e bëjnë punën e tyre me nderë. Ne jemi mësues dhe e kërkojmë vetëm atë që na takon me marrëveshje kolektive”, thotë ai.

Bajmak thotë se kanë mbështetje të plotë edhe nga prindërit dhe janë të gatshëm nëse arrihet marrëveshje për pagat që të punojnë edhe gjatë pushimit të verës për të kompensuar mësimin e humbur.

“Prindërve ju japim notën 5, sepse e kuptojnë grevën shumë seriozisht dhe neve në çfarë situate jemi dhe deri tani nuk kemi pasur ankesa prej asnjërit. Dhe të jenë të bindur se pas grevës nëse ka nevojë do të punojmë edhe pas 10 qershorit”, u shpreh profesori.

Punonjësit arsimorë kanë kërkuar rritje të pagave me 18%, ndërsa Qeveria insiston se mund të ofrojnë vetëm 10 për qind rritje.

Qeveria apelon për ndërprerje të grevës dhe kthim të mësimdhënëse në shkolla.

“Ne kemi ngritur pagën minimale dhe ka një afat ligjor prej gjashtë muajsh për rregullimin e pagave. Ai afat nuk ka skaduar. SASHK-u e filloi grevën pa e hapur dialogun brenda atyre gjashtë muajve. Sipas meje, SASHK-u i ka mashtruar mësimdhënësit sepse nuk i saktësuar të gjitha nenet deri në fund kur bëhet fjalë për zgjidhje ligjore dhe këtë duhet ta bëjë”, deklaroi kryeministri Dimitar Kovaçevski.

Sindikata e Arsimit thotë se me kohë kanë njoftuar për organizimin e grevës dhe ndërprerjes së mësimit.

LEXONI GJITHASHTU

• Mësuesit në RMV në javën e dytë të grevës, kërkojnë rritje pagash