Këtë të shtunë të 10 majit, në Tiranë zhvillohet etapa e dytë e “Giro d’Italia”, një nga garat më prestigjioze të çiklizmit ndërkombëtar. Kjo etapë do të përfshijë vetëm rrugët e qytetit të Tiranës.

Për shkak të zhvillimit të kësaj etape të dytë të garës ndërkombëtare të çiklizmit “Giro d’Italia”, Policia e Tiranës ka njoftuar masat e përkohshme të kufizimit të trafikut dhe parkimit në disa akse kryesore të qytetit.

Për të siguruar zhvillimin e mbarë të garës dhe sigurinë e pjesëmarrësve dhe qytetarëve, do të ndalohet qarkullimi dhe parkimi në disa rrugë gjatë periudhës 10:00-18:00.

Akset e ndaluara përfshijnë Sheshin “Skënderbej”, Rrugën “Urani Pano”, Bulevardin “Gjergj Fishta”, Bulevardin “Bajram Curri” dhe shumë rrugë të tjera të rëndësishme të qytetit, si dhe do të ketë kufizime në aksesin e disa blloqeve të banimit, veçanërisht në zonat pranë “Papa Gjon Pali II” dhe “Ukraina e Lirë”.

Punonjësit e Policisë kanë zhvilluar një instruktazh të posaçëm mëngjesin e sotëm për të siguruar përmbushjen me përpikmëri të detyrave përgjatë itinerarit të garës.

Policia Tiranë kërkon mirëkuptimin dhe bashkëpunimin e qytetarëve dhe drejtuesve të automjeteve për të respektuar këto kufizime të përkohshme dhe për të ndihmuar në ruajtjen e rendit dhe sigurisë gjatë zhvillimit të këtij eventi të rëndësishëm ndërkombëtar.

LEXONI GJITHASHTU:

• Takimi përmbyllës i PD, LaCivita: E gjithë bota i ka sytë në këto zgjedhje
• Rama ironizon Berishën: Do shpallë fitoren dhe më pas revolucionin, LaCivita do…