Deputeti i Partisë së Lirisë, Agron Çela është parë të dalë nga ambientet e Kryeministrisë mbrëmjen e së martës.
Burime për Euronews Albania bëjnë me dije se Çela është takuar me kryeministrin Edi Rama, Elisa Spiropalin si drejtuesen politike të qarkut të Shkodrës, Edona Bilali, Benet Bec i kandidati potencial i PS për bashkinë Shkodër dhe drejtorin e Fondit Shqiptar të Zhvillimit.
Në takimin që ka zgjatur më shumë se 1 orë mësohet se është diskutuar mbi strategjinë e zhvillimit të Shkodrës.
Ndonëse deputeti Çela nuk ka bërë ende asnjë reagim zyrtar për të konfirmuar këtë lajm, sinjalet për një krisje të marrëdhënieve me ish-Lëvizjen Socialiste për Integrim janë dhënë edhe më herët.
E fundit ishte vota e tij pro zgjatjes së afatit për organet e vetingut në 10 shkurt të 2022-shit duke bashkuar votat me mazhorancës socialiste, kur deputetët e Lëvizjes Socialiste për Integrim ndoqën linjën e kryetares Monika Kryemadhi duke abstenuar votimin.
Kalimi i Çelës tek socialistët në prag të zgjedhjeve vendore të 14 majit, nuk do të jetë humbja e vetme për Partinë e Lirisë, pasi bashkë me të do jetë edhe kryetari i Partisë së Lirisë në Shkodër Edmond Ndou.
LEXONI GJITHASHTU:
- ‘Braktisi’ Partinë e Lirisë, Agron Çela shfaqet krah Elisa Spiropalit
- “Të hapur të bashkëpunojmë”, Meta flet pas vizitës në selinë blu
