Fshati i ‘pleqve’ në Librazhd, largohen jashtë vendit mbi 60% e banorëve

Dikur numëronte 3000 banorë ndërsa sot jo me shume se 700 dhe pjesa me dërrmuese e te cilëve janë me shume se 60 vjeç. Kjo është situata në të cilën ndodhet fshati Mirakë ne njësinë Polis pranë bashkisë së Librazhdit dhe kjo për shkak të emigracionit që gjate viteve të fundit ka prekur masivisht edhe këtë zone.

Në zonë sheh shtëpi me dyer e dritare të mbyllura dhe rrugë të boshatisura. Papunësia është shkaku i largimit të më shumë se 60% të popullsisë nga ky fshat. Banorët e mbetur tregojnë se nga fshati nuk janë larguar vetëm të rinjtë.

“Shume kanë ikur nga fshati, të rinj e te reja, s’kanë punë. Kanë ikur në Gjermani, Itali, Angli”, tha një zonjë.

“Sa mbarojnë shkollën e lartë, punojnë dy tre muaj se gjejnë veten dhe ikin.  Shumë ikin në Gjermani”, u shpreh një tjetër banor i fshatit.

Mungesa e banorëve ka vënë në vështirësi edhe ato pak biznese të zonës.

“Ka ranë mbi 60-70%, ka mbetur vetëm pleq do marrin asistencën do vinë dy tre ditë të prishin ato lekë e pastaj do ngelen hiç fare”, tha një banor.

Edhe kryeplaku i fshatit ngre të njëjtat probleme sociale.

“Po shpopullohet. Të rinjtë kanë ikur, arsyeja është se s’ka punë, s’ka të ardhme”, u shpreh Myslim Skodi.

Dikur kjo zonë rurale ishte shumë e frekuentuar nga banorët e Elbasanit, për tu larë gjatë rrjedhjes së Shkumbinit, por sot është braktisur edhe nga banorët e saj.

LEXONI GJITHASHTU:

• Bie numri i lindjeve, mbi 1500 foshnja më pak në tremujorin e tretë
• Në Shqipëri afërisht 80 mijë diabetikë, rreth 4 mijë raste të reja
• Pikë doganore Strugë-Pogradec, Rama tregon detaje nga marrëveshjet në Shkup