Gert Bogdani: Demokratët të zgjedhin personin që i bën ballë Erion Veliajt

Kandidati i PD për primaret për Bashkinë Tiranë, Gert Bogdani është shprehur se ka bërë takime në çdo degë të Tiranës ku dhe ka diskutuar problematikat e qytetarëve.

Në një intervistë për Euronews Albania, Bogdani tha se ka përgatitur programin që ka për Bashkinë e Tiranës nëse vendoset në krye të këtij institucioni.

“Fushata ka qenë shumë intensive dhe shumë e bukur. Kemi bërë takime në çdo degë të Tiranës, unë kam diskutuar dhe problematikat e çdo dege dhe çfarë zgjidhje mund t’i japim problemeve. Është një proces i pritur shumë mirë nga demokratët dhe uroj që të shkojë deri në fund. Është një garë e vërtetë”- theksoi Bogdani.

Ai tha se kjo garë nuk është e zakonshme ndërsa shtoi se demokratët duhet të zgjedhin personin që i bën ballë Erion Veliajt.

“Kam përshtypjen se demokratët kanë filluar ta kuptojnë që kjo nuk është një garë e zakonshme. Demokratët duhet të zgjedhin personin që i bën ballë më shumë Erion Veliajt”- tha ai.

Kandidatët për primaret në PD për Bashkinë e Tiranës, janë Adriana Kalaja, Belind Këlliçi, Enkelejda Fejzo, Fatmir Merkorçi, Gerti Bogdani, Ilir Alimehmeti, Julian Deda.

LEXONI GJITHASHTU: 

• Gara për primaret e Tiranë, 7 kandidatët shpalosin platformat përballë demokratëve
• Indrit Hoxha kandidat për primaret në Bashkinë e Vorës