‘Magjia e turizmit, falsitet’- Berisha: Shqipëria renditet në vendin e 66-të në botë

Ish-kryeministri Sali Berisha është shprehur se të dhënat e paraqitura nga qeveria për turizmin në Shqipëri, janë falsitet.

Komentet Berisha i bëri para mbështetësve nga dritarja e banesës së tij, ku po vuan dënimin me ‘arrest shtëpie’ për korrupsion.

Berisha tha se Shqipëria sipas Forumit Ekonomik Botëror të Davosit renditet në vendin e 66-të për turizmin, për shkak të keqmenaxhimit të potencialit natyror.

Pjesë nga fjala e Berishës:

Mirëmbrëma dhe përshëndetje qëndrestarëve të pamposhtur të kauzës së drejtë të shqiptarëve, oratorëve që me fjalët e tyre ndriçojnë mendjen dhe zemrat e shqiptarëve.

Të dashur miq, sot kam vendosur të paraqes para jush falsitetin e tmerrshëm të magjisë së turizmit, për të cilin televizionet e qeverisë flasin ditë e natë.

Do t’u njoh sonte me studimet e të dhënat reale të ekonomistëve se në rast se ka në botë një turizëm me lugë bosh, është turizmi i Shqipërisë.

Të kuptohemi, në bindjen time më të thellë, Shqipëria me burimet e saj natyrore, me trashëgiminë e saj të jashtëzakonshme kulturore, me mikpritjen e veçantë shqiptare, nuk e ekzagjeroj po të them se mund të synojë nga vendet më të para në botë.

Se mund të jetë ndoshta me potencialin e saj turistik si asnjë vend tjetër për sipërfaqen që ka.

Por çfarë ndodh? Ku renditet Shqipëria sot? Shqipëria sipas Forumit Ekonomik Botëror të Davosit renditet në vendin e 66-të.

Shqipëria renditet në vendin e 66-të jo se ajo nuk i ka magjepsëse potencialet e saj, por menaxhimi i këtyre potencialeve është mizerabël, është nga hajdutë që vjedhin nga mëngjesi gjer në darkë.

Të dashur miq, shqiptarët duhet ta dinë se çfarë falsiteti, çfarë mashtrimi, por duhet ta mësojnë se si turizmi është shndërruar në një ndëshkim, në një pasuri të mallkuar për ta.

LEXONI GJITHASHTU:

• Berisha zbulon 2 taksat që do të hiqen të parat nëse PD vjen në pushtet
• Berisha mbetet “non-grata” në Britani, ecuria e procesit dhe vendimi i shpallur sot