Mbrëmje gala, prindër dhe aktivistë kërkojnë mbështetje për fëmijë me Sindromën Down

Një mbrëmje gala për Sindromën Down solli emocione dhe thirrje të forta për mbështetje. Në ambientet e hotel “Rogner” në Tiranë, prindër, aktivistë dhe figura publike u bashkuan në një aktivitet që kërkoi më shumë vëmendje nga shteti.

Në një video-mesazh, prindër të fëmijëve me nevoja të veçanta në Shqipëri kërkuan më shumë mbështetje nga institucionet shtetërore, veçanërisht për kujdesin dhe edukimin e fëmijëve të tyre:

 “Kërkojmë pagesa mujore më të larta për të garantuar kujdesin për fëmijët tanë”.

“Kërkojmë lehtësira nga pushteti vendor për organizata si e jona që ofrojnë shërbime të specializuara”.

“Kërkojmë që udhërrëfyesit dhe protokollet shëndetësore të miratohen nga Ministria e Shëndetësisë. Kërkojmë investime serioze për arsimin gjithëpërfshirës.”

Emanuela Pepkola, themeluese e Down Syndrome Albania, në fjalimin e saj u shpreh se fondacioni ka humbur një nga mbështetësit më të rëndësishëm, një donator zviceran që kontribuonte deri në 100 mijë euro në vit për mbështetjen e fëmijëve me Sindromën Down. Ajo bëri thirrje për ndihmë:

“Nëse keni mundësi, flisni dhe me miq të tjerë në sektorin e biznesit, ne këtu sot jemi rreth 190 veta. Jemi në një moment kritik dhe çdo kontribut, sado i vogël, është i çmuar për të vijuar punën tonë me këta fëmijë. Secili prej jush sikur nga 5-10 mije leke ne ëëëdsalbania.org të dhurojë, është vërtet kyçe.”

Mbrëmja solli edhe momente prekëse e frymëzuese, ku fëmijë dhe të rinj me Sindromën Down shfaqën talentet e tyre përmes muzikës, artit dhe fjalëve të ngrohta, duke krijuar një atmosferë të paharrueshme solidariteti dhe shprese.

Qëllimi i këtij aktiviteti ishte rritja e ndërgjegjësimit publik për rëndësinë e përfshirjes së personave me Sindromën Down në jetën sociale, arsimore dhe profesionale, si dhe promovimi i vlerave të barazisë, respektit dhe dashurisë pa paragjykime.

LEXONI GJITHASHTU:

• Koncert bamirësie në TKOB, të ardhurat shkojnë për fëmijët me Sindromën Down
• Dita e Sindromës Down/ Prindërit: Heqja e pagesës së kujdestarisë e papranueshme