Policia e Tiranëa finalizoi operacionin e koduar “Suspend”, duke goditur një rast të trafikimit të armëve të zjarrit nga Kosova me qëllim shitjen në Tiranë.

Pas hetimeve disamujore dhe operacioneve të koordinuara me Prokurorinë, dy shtetas kosovarë, 23-vjeçari Altin Pajaziti dhe 53-vjeçari Kadri Prushi u ndaluan në autostradën “Lezhë – Fushë Krujë” pasi dyshohet se po tentonin të trafikonin dy pistoleta dhe municion luftarak nga Kosova drejt Shqipërisë.

Gjatë operacionit, Policia sekuestroi dy armët e zjarrit në automjetin e dy të dyshuarve ndërsa vijojnë hetimet për identifikimin e personave të tjerë të përfshirë në këtë aktivitet kriminal.

Njoftimi i policisë

DVP Tiranë/Finalizohet pas hetimeve disamujore, operacioni policor i koduar “Suspend”.

Vihen në pranga 2 shtetas kosovarë të cilët dyshohet se i kanë trafikuar 2 pistoletat, me qëllim shitjen në Tiranë, me vlerë afro 10 000 euro.

Si rezultat i hetimeve disamujore të kryera me metoda proaktive, në drejtimin e Prokurorisë, për goditjen e veprimtarisë kriminale të shitjes së armëve të zjarrit, Seksioni për Hetimin e Trafiqeve të Paligjshme, në bashkëpunim me Forcën Operacionale të DVP Tiranë, ka organizuar dhe finalizuar operacionin policor të koduar “Suspend”, si rezultat i të cilit u arrestuan shtetasit:

A. P., 23 vjeç dhe K. P., 53 vjeç, të dy banues në Kosovë.

Gjatë operacionit, shërbimet e Policisë kanë ndaluar në autostradën “Lezhë – Fushë Krujë”, automjetin me të cilin qarkullonin shtetasit A. P. dhe K. P., në të cilin, gjatë kontrollit, kanë gjetur dhe sekuestruar 2 armë zjarri pistoleta dhe municion luftarak. Nga hetimet dyshohet se këta shtetas i kanë trafikuar pistoletat nga Kosova, me qëllim shitjen në Tiranë.

Vijojnë hetimet në drejtimin e Prokurorisë, për dokumentimin e plotë të veprimtarisë kriminale të këtyre shtetasve, identifikimin dhe kapjen e shtetasve të tjerë të përfshirë.

Materialet procedurale i kaluan Prokurorisë, për veprime të mëtejshme.

LEXONI GJITHASHTU:

• Shpërthen një granatë dore brenda Postës së Kosovës në Zveçan, çfarë thotë policia
• Plagosi me thikë bashkëmoshatarin, pse Gjykata e Sarandës liroi 17-vjeçarin