Mundësitë e dyta për maturantët, sezoni i dytë i provimeve nis më 24 gusht

Të gjithë maturantët të cilët rezultuan mbetës në një nga katër provimet e maturës gjatë fazës së parë do të kenë mundësi t’i nënshtrohen sërish testit. Sesioni i dytë i provimeve për maturantët do të nisë me datë 24 gusht me provimin e gjuhës së huaj, për të vijuar me provimin e Gjuhës Shqipe dhe Letërsisë me datë 27 gusht, me provimin e matematikës me datë 31 dhe për të përfunduar me atë të lëndës me zgjedhje me datë 3 shtator. (Grafikë)

Përveç maturantëve mbetës gjatë maturës së këtij viti, në udhëzimin e miratuar nga Ministria e Arsimit Sportit dhe Rinisë përcaktohen edhe një sërë kategorish të tjera të cilat mund t’u nënshtrohen provimeve, të cilat janë:

Maturantët që kanë mbetur në një apo dy lëndë të vitit shkollor 2019-2020 dhe i shlyejnë ato brenda datës 20 gusht. Kandidatët që e kanë mbaruar shkollën para vitit 2019 por nuk kanë shlyer detyrimet  e maturës shtetërore. 

Gjithashtu edhe kandidatët që kanë mbaruar shkollën e mesme jashtë vendit dhe i kanë të njehsuara dokumentet shkollore nga QSHA. Tezat e provimit do të jenë sërish me 60 pyetje vetëm me alternativa dhe kohëzgjatja e tyre është 2 orë e 30 minuta.