Nga kitara te mobileria, muzikanti lë Filipinet për të punuar në Shqipëri

Të huajt që vijnë në Shqipëri mbartin me vete një sërë historish të veçanta. Gazetarja Ortensa Budlla sjell historinë e Ruben Sorrera-s, një muzikant 52-vjeçar nga Filipinet, i cili sot punon në një fabrikë mobiljesh në Shijak.

Ruben ka lënë pas një karrierë muzikore për të ndjekur një mundësi të re jetese në Shqipëri, pas vitesh përpjekjesh të pasuksesshme për të gjetur punë në vendin e tij.

“Kam nëntë muaj që punoj këtu. Në Filipine ishte shumë e vështirë të gjeja punë për shkak të moshës sime. Pasi kalon të 50-at, nuk të pranojnë më për punë. Mendojnë se je shumë i vjetër,” thotë Ruben.

Dikur pjesë e një bande muzikore, ai jetonte një jetë të qetë, por të mbushur me vështirësi për shkak të stresit të punës si elektricist. Ndërsa në Shqipëri, edhe pse puna në fabrikë është fizike, ai ndjehet më i qetë dhe i vlerësuar.

“Në Filipine isha elektricist dhe puna ishte shumë stresuese mendërisht. Këtu më thonë çfarë të bëj dhe e bëj. Punë, punë, shumë punë – jo gjumë! Kur po pushon pak, të thonë: ‘O, jo gjumë!’” thotë ai me humor.

Pasionin për muzikën nuk e ka lënë pas. Kitara e tij është shoqëruesja e pandarë në momentet e vetmisë.

“Kur ndihem vetëm, luaj muzikë. Zgjohem në 5 të mëngjesit dhe luaj deri në 8. E njëjta gjë edhe në darkë,” tregon ai.

Edhe pse larg familjes dhe vajzës së tij 14-vjeçare që jeton në Filipine, Ruben është i vendosur të vazhdojë këtë kapitull të ri në jetë. Ai e sheh Shqipërinë si një mundësi më të mirë për të siguruar të ardhura dhe për të ndërtuar një të ardhme më të qëndrueshme.

“Të ardhurat këtu janë më të mira se në Filipine. Atje, pas 25 vitesh punë, fitova vetëm 2400 euro. Kisha për të paguar qira, sigurime, taksa të larta. Ndërsa këtu, kompania mbulon shumicën e shpenzimeve, gjë që më lejon të kursej më shumë,” përfundon ai.

Historia e Rubenit është një shembull frymëzues i kurajos për të nisur nga e para, pavarësisht moshës apo sfidave që sjell jeta.

LEXONI GJITHASHTU:

• Nga Filipinet në Shijak, historia e emigrantit me dy gra: Punoj në një mobileri
• Dhunoi fëmijën e mitur në familjen ku punonte si sanitare, arrestohet filipinezja