Operimi me pacientë zgjuar, Xhumari: Fillimisht evidentohej epilepsia, tani tumoret

Shefi i shërbimit të Neurokirurgjisë në QSUT, Artur Xhumari ka folur rreth ndërhyrjes kirurgjikale që u krye në trurin e një pacienti, teksa ai ishte zgjuar.

Në emisionin “Good Morning Albanians” në Euronews Albania, Xhumari u shpreh se kjo teknikë, është përdorur fillimisht për të evidentuar epilepsinë, por edhe tumoret, siç ishte rasti i pacientit 24-vjeçar.

“Ne jemi mësuar me këto lloj operacionesh dhe këto lloj sëmundjesh. Rasti që po flasim ka të veçantë që ishte në një zonë shumë delikate të trurit. Ne kaluam 2-3 vite, duke e ndjekur të sëmurin. Menduam se do bënim ndonjë dëm të madh nëse do e operonim, por kur pamë që dëmtimi i trurit po rritej, tumori, vendosëm që të gjejmë një teknikë që ta operojmë dhe mos t’i bënim dëm.

Një sëmundje tjetër është epilepsia, e cila ndonjëherë, është zona e trurit, shkaktarja dhe ne e operojmë, e heqim këtë zonë. Duhet të lokalizosh se ku është kjo zonë, që të heqësh atë që është përgjegjësja. Tentativa e parë duke përdorur këtë teknologji, ka këtë teknikë “, theksoi ai.

Një ndërhyrje kirurgjikale e vështirë është kryer me sukses në Neurokirurgjinë e QSUT. Mjekët kanë kryer ndërhyrjen delikate në tru me pacientin zgjuar.

Tumori ishte në një zonë të rëndësishme për funksionimin e fytyrës. Pasi tumori vazhdoi të rritej, mjekët u detyruan të kryenin një ndërhyrje. Por atyre iu desh që ta bënin këtë nëpërmjet kirurgjisë zgjuar duke marrë parasysh dhe rreziqet që vinin për 24-vjeçarin.