Reforma në arsimin profesional, 3 shkolla në Korçë bashkohen në 1 drejtori të vetme

Tri shkolla profesionale në qytetin e Korçës janë bashkuar në një drejtori të vetme. Bëhet fjalë për shkollën e mekanikes, të ndërtimit dhe të teknologji-informacion-komunikimit, ku sipas drejtoreshës e cila do të menaxhojë këto tre shkolla, gjithçka vjen si pasojë e reformës së re në arsimin profesional.

“Është pikërisht Ministria e Financës dhe Ekonomisë që ka ndërtuar një plan organizimi të rrjetit të gjithë ofruesve të arsimit profesional, duke marrë parasysh përputhjen e ofertës dhe kërkesës së gjithë rajonit. Do të kemi staf, burime njerëzore të bashkuara, kabinete për profile të ngjashme dhe kurrikulat janë ato të miratuara”, tha Anxhela Taho, drejtoreshë e Shkollës Teknike Profesionale Korçë.

Një tjetër fakt është se në shkollat e mekanikes dhe ndërtimit asnjë nxënëse nuk është e regjistruar, duke pasur vetëm djem në përbërjen e tyre.

Por a ka ardhur ky ndryshim si pasojë e uljes së numrit të nxënësve në gjithë vendin?

“Të tria shkollat profesionale që unë përmenda kanë një rritje, të vogël, por kanë një rritje për vitin 2023-2024. E theksoj se nuk është arsyeja e uljes së numrit të nxënësve. Janë pikat kombëtare të strategjisë, plani i optimizmit, është i mbështetur në analizë të kontekstit ekonomik në rajonin e Korçës. Duam të vijmë në treg se cilat janë mundësitë për t’u përmirësuar”,  u shpreh ajo.

Krahas bashkimit të këtyre tri shkollave, një gjë e ngjashme do të ndodhë edhe në dy shkollat e tjera profesionale në Korçë, atë të bujqësisë dhe ekonomikut.

LEXONI GJITHASHTU:

• Infermieria shumë e kërkuar/ Prifti: Mësuesia rrezikon të mbyllet në Korçë
• Breshëri shkatërron mollët në Korçë, fermerët në protestë