Shembja e digës në hidrocentralin e Sasajt, KLSH konstaton një sërë shkeljesh

Kontrolli i Lartë i Shtetit ka konstatuar një sërë shkeljesh në Hidrocentralin e Sasajt në Himarë, i cili u dëmtua në mes të janarit, duke shkaktuar përmbytje në banesa dhe biznese në zonë.

Sipas gjetjeve të para të auditit, që vijon ende, ky hidrocentral nuk ka qenë objekt i asnjë kontrolli nga institucionet përgjegjëse që prej ndërtimit dhe fillimit të funksionimit të tij. KLSH thekson se nëse këto institucione do të kishin kryer inspektimet e duhura dhe do të kishin identifikuar problematikat e mundshme, dëmtimi i digës dhe përmbytjet mund të ishin shmangur.

Në kuadër të parandalimit të rasteve të ngjashme, KLSH ka njoftuar se do të shtrijë auditimet edhe në hidrocentrale të tjera në mbarë vendin. Gjithashtu, u ka bërë thirrje qytetarëve që të sinjalizojnë pranë institucionit për çdo problematikë të kësaj natyre, me qëllim forcimin e mbikëqyrjes dhe parandalimin e ngjarjeve të ngjashme në të ardhmen.

LEXONI GJITHASHTU:

• Shembja e ujëmbledhësit në Himarë: Prezencë e madhe uji në biznese e baza ushqimore
• VIDEO| Çahet diga e hidrocentralit në Himarë, rrezik për përmbytje