Skenarët për qeverinë e re në Kosovë, analisti: Ç’ndodh nëse Kurti s’formon shumicën

Analisti Dritëro Arifi ishte këtë të hënë i ftuar në Euronews Albania për të komentuar rreth zgjedhjeve të mbajtura ditën e djeshme (9 shkurt 2025) në Kosovë. Vetëvendosja e Albin Kurtit ka dalë partia e parë dhe i takon asaj që të formojë qeverinë.

Arifi tha se nëse LVV nuk do të arrijë dot të formojë shumicën qeverisëse atëherë i takon partisë së dytë PDK-së që të formojë qeverinë, por kjo sipas analistit duket të jetë shumë e vështirë.

“Vetëvendosja ka fituar 41% të votave, kjo është e pamjaftueshme për të bërë qeverinë vetë.  Partitë opozitare, nëse marrin vetëm votën shqiptare, se janë edhe 20 vende të rezervuara për pakicat.

Nga 100 vende për shqiptarët, i bie që më shumë deputetë të ketë opozita se pozita. 46 ulëse në Kuvendin e Kosovës do i ketë Vetëvendosja, ndërsa opozita së bashku ka 54 vende (25 mandate PDK, 20 mandate LDK, 9 AAK) , kjo është e mjaftueshme për të krijuar qeverinë, Megjithatë sipas kushtetutës, i takon partisë së parë që të formojë qeverinë.

Nëse Vetëvendosja nuk do të arrijë të formojë qeverinë, atëherë partia e dytë ka të drejtë të formojë qeverinë megjithatë kjo do të jetë shumë e vështirë. Edhe nëse krijohet koalicion Vetëvendosje- PDK, do të jetë i pakuptimtë, nëse nuk sqarohet paraprakisht çfarë do ndodh me dialogun dhe gjykatën speciale. LDK e ka provuar njëherë këtë dhe humbi shumë te elektorati kur u shkëput nga LVV.

LEXONI GJITHASHTU:

• “Qeveria e Kurtit do jetë e dobët”, analisti Hoxha: Mund të mos formojë shumicë
• Komisioni i Zgjedhjeve në Kosovë publikon rezultatet paraprake