SPAK merr zyrtarisht të pandehur Plarent Ndrecën, prokuroria zbardh akuzën

Prokuroria e Posaçme ka dalë me një njoftim zyrtar lidhur me komunikimin e akuzës për deputetin Plarent Ndreca.

Në njoftimin e saj Prokuroria deklaron se Ndrecës i është komunikuar akuza Shkelje e barazisë së pjesëmarrësve në tendera apo ankande publike”. Kjo akuzë është tërhequr këtë të premte nga avokati i tij Ermal Yzeiraj.

“Duke iu përgjigjur interesit të gjerë publik, ju komunikojmë se më dt.25.10.2024, të pandehurit, Plarent Ndreca, i është komunikuar, përmes avokatit të tij, përfundimi i hetimeve për procedimin penal nr.240/2021 për veprën penale “Shkelje e barazisë së pjesëmarrësve në tendera apo ankande publike”, parashikuar nga nenet 258 dhe 25 të Kodit Penal. Më shumë detaje do të vijojnë në një moment të dytë”,-thuhet në njoftim.

Plarent Ndreca dyshohet se ka kryer veprën penale gjatë kohës kur ka shërbyer si Sekretar i Përgjithshëm i Ministrisë së Brendshme.

Kallëzimi në SPAK u bë nga Kontrolli i Lartë i Shtetit, i cili dyshon se zyrtarët kanë lejuar mospërputhje dhe devijime ligjore në garën për ndërhyrje në Komisariatet e Vlorës, Mirditës, Pogradecit dhe atij nr. 4 në Tiranë.

Sipas KLSH-së, gjatë kontrollit u gjetën mospërputhje dhe devijime ligjore, si pasojë e shkeljeve të dispozitave ligjore në procedurat e prokurimit publik, të cilat kanë cënuar barazinë e pjesëmarrësve në tendera.

Gjithashtu, ka pasur edhe rritje të paargumentuar të vlerës së kostove të ndërtimit dhe kostove të projektimit në procedurën e prokurimit. Procedurat janë kryer kur kjo ministri drejtohej nga Sandër Lleshaj, teksa është duke u hetuar edhe një tjetër tender i kësaj periudhe që ka të bëjë me uniformat e Policisë së Shtetit.

LEXONI GJITHASHTU:

• Ndreca: S’është privilegj të jesh investitor strategjik, më shumë fitojnë shqiptarët
• PS ‘krah’ Xhaçkës në Kuvend, Ndreca: SPAK nuk ka dyshime për burrin e deputetes