Mbërrin avioni i parë nga Stambolli me 47 shqiptarë, shumica studentë

Nisi sot faza e dytë e operacionit të riatdhesimit për shtetasit shqiptarë që kanë mbetur jashtë territorit të vendit. Avioni i parë mbërriti nga Stambolli me 47 pasagjerë në bord, shumica prej tyre studentë në Turqi.

“Unë jam në shkollë dhe shkolla nuk vazhdon më, nuk kisha pse qëndroja më”, tha një studente shqiptare, e cila u kthye nga Turqia.

“Nuk kemi pritur shumë, ky ka qenë aplikimi i parë që kam bërë për t’u kthyer në Shqipëri”, tha një shqiptar tjetër i riatdhesuar.

Mbrëmjen e sotme është parashikuar mbërritja e një avioni tjetër nga Roma me shtetas që kanë aplikuar për t’u rikthyer në Shqipëri. Të gjithë të riatdhesuarit do të karantinohen në disa hotele në Durrës për 14 ditë, ndërsa transportimi i tyre në këto struktura u shoqërua nga Policia e Shtetit. Ata kanë paguar biletën prej 100 euro si dhe do të paguajnë 7 euro në ditë për ushqimin.

Në ditët në vijim janë parashikuar fluturime edhe nga Milano, Bari, Frankfurti , Londra dhe Parisi për shqiptarët që kanë mbetur në këto vende dhe duan të kthehen si pasojë e situatës së shkaktuar nga COVID- 19.

Këto fluturime do të jenë në dispozicion jo vetëm për shtetasit që duan të kthehen në atdhe, por edhe për shtetasit shqiptarë apo të huaj, që duan të udhëtojnë nga Shqipëria drejt destinacioneve europiane, ku kanë lejen e qëndrimit.