Sveçla: Radoiçiç, në krye të kontrabandistëve që sulmojnë Policinë në veri

Ata që janë duke e sulmuar Policinë e Kosovës në veri të vendit, janë të njohur për organet e rendit si individë të kyçur në aktivitete ilegale.

Kështu deklaron për Radion Evropa e Lirë, ministri i Punëve të Brendshme të Kosovës, Xhelal Sveçla.

Sipas tij, janë disa grupe të kontrabandistëve, që janë të koordinuara ngushtë nga institucionet e Serbisë.

Ministri i Brendshëm nënvizon se Serbia i shfrytëzon këto grupe për të minuar autoritetin e Kosovës në veri të vendit, ndërsa si shpërblim, shton ai, u jep mundësi për t’u pasuruar si dhe imunitet pa kufi.

Sveçla thotë se Millan Radoiçiç, i cili është në arrati nga organet e Kosovës për rastin “Brezovica”, është njëri ndër krerët e këtyre strukturave.

Kujtojmë që Radoiçiç është edhe në listën e zezë të Shteteve të Bashkuara nën dyshimet se së bashku me biznesmenin nga veriu i Kosovës, Zvonko Veselinoviq dhe dhjetëra serbë të tjerë, i përkasin një rrjeti të lidhur me krimin e organizuar ndërkombëtar.

LEXONI GJITHASHTU:

• Kurti: Kosova vendi më pro-BE në Ballkanin Perëndimor, por më i izoluari
• Kuvendi i Kosovës hap dyert për bashkatdhetarët
• Aksion anti-kontrabandë në veri të Kosovës, lëndohen 5 policë