Nën hetim nga SPAK/ Reagon kryebashkiaku i Rrogozhinës: Po baltosin familjarët e mi

Edison Memolla, kryebashkiaku i Rrogozhinës i cili është person nën hetim nga SPAK, tha në një reagim se akuzat kundër tij janë të pafalshme.

Me anë të një postimi në Facebook, Memolla tha se deri më sot është përballur me çdo akuzë, shpifje apo lajm të rremë dhe nuk ka dalë ndonjëherë kundër tyre, pasi sipas tij ka preferuar ti përgjigjet vetëm drejtësisë.

Megjithatë shton Memolla, duke qenë se tanimë sipas tij “po hidhet baltë edhe mbi familjarët e tij”, ai shprehet i vendosur për të përdor “çdo armë të mundshme ligjore për t’i mbrojtur”.

“Deri më sot jam përballur me çdo akuzë, shpifje, të pavërtetë apo lajm të rremë që prej kohesh kanë dalë për të ulur në sytë e gjithkujt imazhin tim.

Të qenurit pjesë e politikës padyshim që të bën të jesh në shënjestër të shumë kazanëve mediatik vetëm për të përmbushur kërkesat e personave të etur për pushtet që fshihen pas siglave televizive.

Megjithatë kurrë nuk kam dalë kundër tyre hapur pasi jam individ që di ti përgjigjem drejtësisë për aq kohë sa punën dhe postin që ma kanë besuar qytetarët e mi e drejtoj me ndershmëri dhe pastërti. Por fakti që përveç meje po baltosni familjarë të mi me akuza tepër të rënda dhe të pafalshme, madje për të disatën herë, më bën të reagoj dhe të përdor çdo armë të mundshme ligjore për t’i mbrojtur ata.

Kushdo që na njeh e di mirë me sa mund dhe djersë ka arritur familja ime të jetë kjo që është tani dhe për të gjithë ata që nxjerrin fjalë të tjera përveçse kësaj të vërtete, tashmë do të shihemi qoftë edhe për shpifjen më të rëndomtë, në dyert e të gjitha institucioneve të drejtësisë.

Me respekt,

Edison Memolla”,-ka shkruar Memolla në statusin e tij në Facebook.

LEXONI GJITHASHTU:

• “Diçka e madhe po luhet!” Lita zbardh 120 minutat e zyrtarit amerikan në SPAK
• Spahiu: KLSH e Arben Shehut i vetmi partner që mbështet SPAK me kallëzime penale