Historia e trishtë, maturanti më i moshuar dëmtoi sytë me dinamit kur ishte 21 vjeç

Maturanti më i moshuar në Shqipëri, 74-vjeçari Skënder Cena, ishte i ftuar në emisionin “People”, ku rrëfeu historinë e jetës, vështirësitë dhe peripecitë e saj, si dhe arsyen pse, në një moshë kaq të madhe, vendosi të jepte provimin e maturës.

Ajo që të gjithë dinim ishte se ai u bë maturanti më i moshuar, por askush nuk e dinte historinë e tij të dhimbshme.

Rrjedha e jetës së tij mori një kthesë të madhe, kur fatkeqësisht, në moshën 21-vjeçare, Skënder Cena nga Kukësi, ndërsa punonte me kolegët për hapjen e tuneleve të hidrocentralit në Fierzë, pësoi një aksident të rëndë.

Dinamiti që po përdorej shpërtheu papritur. Ai humbi shikimin në njërin sy, ndërsa syri tjetër u dëmtua rëndë. Dy shokët e tij humbën jetën.

“Mina na plasi afër kur e mbushëm dinamitin. Duke punuar me idenë që ajo kishte plasur, na plasi në dorë. U operova në Tiranë, por nuk shkoi shumë mirë operacioni – njëri sy u prish krejtësisht, tjetri u dëmtua rëndë. Më pas mora statusin e invalidit që në moshë të re,” – rrëfen ai.

Cena tregon se nga Kukësi u shpërngul në Kamëz në vitin 1990, ashtu si shumë bashkëfshatarë të tij. Ai tregoi se hyri në provimin e gjuhës së huaj me qëllim që të marrë diplomën e maturës shtetërore në degën “Shërbime mjetesh transporti”.

“Kam mbyllur ‘part time’-in në vitin 2016. Në atë vit i mora të gjitha provimet, përveç gjuhës së huaj – anglishtes – që e dhashë këtë vit,” – tha ai.

E vetmja mundësi që ai të diplomohej ishte të hynte në provim dhe të merrte një notë kaluese, prandaj, edhe pse është 74-vjeç, ai e dha provimin këtë vit në Kamëz.

LEXONI GJITHASHTU:

• I moshuari nuk heq dorë nga arsimimi: 74-vjeçari, maturanti më i vjetër në Shqipëri
• “Identitete në Telajo”, ekspozita e maturantëve të shkollës artistike “Onufri”