Frika ndaj coronavirusit, Shqipëria shton masat, në Kosovë 2 raste dalin negative

Mbërritja e coronavirusit covid-19 te fqinjët tanë, ka bërë që në Shqipëri dhe gjithë rajonin të shtohen masat, por në të njëjtën kohë edhe paniku. Ministria e Shëndetësisë, Ogerta Manastirliu vendosi të përforcojë masat në pikat kufitare dhe të kontrollohet çdo udhëtar që vjen nga harta gjeografike e zonave të prekura nga kjo sëmundje.

“Pas diskutimeve mes ekspertëve dhe drejtuesve të institucioneve, u vendos përforcimi i masave në pikat kufitare, sigurimi i sasisë së shtuar të mjeteve të mbrojtjes personale dhe përforcimi i gjurmimit të rasteve për të rritur kontrollin për parandalimin e depërtimit të coronavirusit COVID-19”, thuhet në njoftimin e shpërndarë për mediat.

Ndërkaq në Kosovë kanë dalë mëngjesin e sotëm përgjigjet e analizave për dy persona, që u dyshuan se ishin prekur nga coronavirusi.

Instituti Kombëtar i Shëndetësisë Publike ka njoftuar se rezultatet dolën negative.

“Pacientët kanë pasur ethe, kollë të thatë, këputje dhe vështirësi në frymëmarrje. Ekipi i Laboratorit të Mikrobiologjisë Molekulare ka kryer tre analizat e nevojshme të cilat kanë rezultuar negative”, ka deklaruar Instituti.

Ndërkohë autoritetet kanë marrë masa në pikat kufitare dhe personeli mjekësor është në gatishmëri.