Tetori Rozë, muaji ndërgjegjësues për luftën kundër kancerit të gjirit

Tetori Rozë është muaji ndërkombëtar i dedikuar ndërgjegjësimit për kancerin e gjirit, një sëmundje që prek kryesisht gratë, por jo vetëm. Ky muaj shërben për të informuar dhe sensibilizuar publikun mbi rëndësinë e diagnostikimit të hershëm dhe parandalimit të sëmundjes, që vazhdon të jetë një nga shkaktarët kryesorë të vdekshmërisë në botë.

Gjatë Tetorit Rozë organizohen fushata të ndryshme në të gjithë vendin dhe globin, me qëllim të nxisin gratë që të kryejnë kontrolle të rregullta dhe të përfitojnë nga shërbimet falas apo lehtësuese për diagnostikimin e kancerit të gjirit.

Në këtë kuadër, kryeministri Edi Rama ka nisur ditën e sotme me një mesazh në rrjetet sociale, ku bën thirrje të gjitha grave dhe vajzave që të kujdesen për shëndetin e tyre dhe të kryejnë mamografinë falas në poliklinikat dhe spitalet rajonale në Shqipëri.

“MIRËMËNGJES 💗 dhe me thirrjen e përvitshme në çdo #TetorRozë për të gjitha gratë dhe vajzat që të marrin fare pak kohë për t’u kujdesur për veten, duke bërë mamografinë falas në rrjetin e poliklinikave dhe spitaleve rajonale në vend, ju uroj një muaj të mbarë 🫶”, shkruan Rama.

Tetori Rozë rikujton rëndësinë e vetëdijes dhe veprimit të hershëm për të shpëtuar jetë dhe për të përmirësuar cilësinë e jetës së pacientëve me kancer të gjirit.

LEXONI GJITHASHTU:

• Tetori rozë/ Mesazh i gruas me kancer gjiri: Mos e lini sëmundjen t’ju mbizotërojë
• Maratona për Tetorin Rozë” në Tiranë, të ardhurat shkojnë për kancerin e gjirit