Gazetarja nga Kosova: Mediat serbe na fajësojnë ne për tensionin e krijuar

Vendkalimet Jarinjë dhe Bërnjak në veri të Kosovës janë ende të mbyllura për këmbësorë si dhe për qarkullim të veturave dhe e vetmja mënyrë për të kaluar është përmes Merdares.

Ndërkohë, nga Jarinja në Zveçan ka disa barrikada, ndërsa më së shumti njerëz janë te barrikada afër Rudare, afër kryqit, ku është bllokuar plotësisht qarkullimi nga Zveçani në Prishtinë.

Gazetarja nga Kosova, Florijeta Denjani tha në emisionin Good Morning Albanians në Euronews Albania se në mediat serbe përgjegjëse për situatën e tensionuar në veri bëhet Kosova.

Ajo u shpreh se mediat serbe, gjendjen në Veri dhe incidentet i arsyetojnë për shkak të veprimeve të Kosovës.

Denjani tregoi se sulmi ndaj gazetarëve shqiptarë në Veri ndodhi në momentin që këta të fundit iu afruan barrikadave, duke ua bërë që të ndërpritet transmetimi direkt nëpër televizione e Kosovës.

“Duhet përmendur edhe fakti që ndërkombëtarët në reagimet e tyre asnjëherë nuk kanë përmendur sulmin ndaj policëve të Kosovës, por vetëm një sulm ndaj EULEX, në një farë forme është amnistuar gjithë sulmi që i është bërë policisë së Kosovës”, tha gazetarja.

LEXONI GJITHASHTU:

• Banori i Mitrovicës së Veriut: Ka pasur përplasje mes banorëve shqiptarë dhe serbëve
• Tensionet në veri të Kosovës: Gazetari zbulon detajet e fundit