Gjyqi për statutin e PD, diskutojnë juristët e PD-së zyrtare dhe Rithemelimit

Përfaqësuesit ligjorë të Partisë Demokratike zyrtare dhe të Rithemelimit ishin në Euronews Albania për të folur mbi proceset gjyqësore që shoqërojnë PD-në, konkretisht për gjyqin për statutin.

Përfaqësuesi ligjor i PD-së zyrtare, Rezart Kthupi tha se kanë tre seanca që kërkojnë t’ju vihet në dispozicion një set dokumentesh.

Pala tjetër, Këshilli Kombëtar i pretenduar, siç e cilësoi ai, që përfaqësohet nga 7 deputetë ka paraqitur në gjykatë një dokumentacion nga i cili pretendon se ka një mbledhje të Këshillit Kombëtar nga ku janë marrë disa vendime.

“Në këtë pikë ka një ndërthurje ndërmjet vendimeve të Këshillit Kombëtar të pretenduar dhe statutit të depozituar nga ana jonë, shkak për të cilin ne kërkojmë që në këtë gjykim ne të na sillet jo vetëm njoftimi i mbledhjes për Këshillin Kombëtar dhe vendimi i marrë, por dhe procedura e ndërmjetme,” – sqaroi Kthupi.

Nga ana tjetër përfaqësuesi ligjor i Rithemelimit, Franc Nuri pohoi se është e vërtetë që është përfshirë si palë e tretë pjesa e Këshillit Kombëtar të PD-së. Sidoqoftë ai theksoi se Gjykata i ka njohur si Partia Demokratike përfaqësuar nga Rithemelimi dhe edhe ata konsiderohen një palë e tretë.

“Jemi dhe ne palë e tretë dhe këtu dua të insistoj. Dhe ne si palë e tretë kemi kërkuar pezullimin e këtij gjykimi dhe argumenti është se ne jemi në konflikt për vulën dhe për drejtimin e Partisë Demokratike dhe ky konflikt gjyqësor, juridik nuk është zgjidhur në mënyrë përfundimtare dhe nëse kjo zgjidhet, që mund të zgjidhet menjëherë nga Gjykata e Lartë duke na dhënë të drejtë me anë të rekursit që kemi depozituar,” – u shpreh Nuri.

LEXONI GJITHASHTU:

• Gazment Bardhi përjashtohet nga Partia Demokratike
• Voton Lulzim Basha: Sot ringrihet Partia Demokratike