Meta i përgjigjet Lamallarit: Diella e Drejtësisë nuk e di që në burgje ka vetëm 3 orë ujë dhe drita

Kreu i Partisë së Lirisë, Ilir Meta, ka reaguar pas interpelancës së sotme me ministrin e Drejtësisë, Besart Lamallari, kërkesë e Sekretarit të Përgjithshëm të PL, Tedi Blushi. Në një postim në Facebook, Meta ka ironizuar ministrin duke e krahasuar me “Diellën”, Ministren e Inteligjencës Artificiale.

Meta ka bërë të ditur se vetëm dje në IEVP “Jordan Misja” ka pasur 42 ndërprerje të energjisë elektrike, duke treguar sipas tij gjendjen problematike të burgjeve. Ai ka denoncuar gjithashtu mungesën e shërbimit shëndetësor, si dhe mos-shpërblimin e gardianëve për punën jashtë orarit.

“Dëgjova ‘Diellën’ e Drejtësisë që fliste për situatën në burgje dhe po e njoftoj që vetëm dje ka ikur 42 herë energjia elektrike për rreth 500 të burgosur e të paraburgosur. A e di ‘Diella’ që këtu ka vetëm 3 orë ujë në ditë? A e di që në burgje vdesin qytetarë për mungesën e trajtimit të duhur shëndetësor? A e di që gardianët nuk kanë marrë asnjë qindarkë shpërblim për punën jashtë orarit?” – shkruan Meta.

Ai shton se “Diellat” janë sipas tij “pjellë e AKSHI-t, simbolit të korrupsionit skizofrenik”, ndërsa kërkon respektimin e të drejtave të tij, duke kujtuar se vendimi i 2 korrikut 2025 për dënimin e tij të dytë nuk i është dorëzuar ende as atij, as avokatit.