‘Nuk biseduam me aleatët’, Luçiano Boçi zbulon skenarin e protestës së 6 dhjetorit

Deputeti i Partisë Demokratike, Luçiano Boçi deklaroi se kjo forcë politike nuk ka biseduar me aleatët, në lidhje me protestën që pritet të zhvillohet më 6 dhjetor.

Në një intervistë për Euronews Albania, Boçi u shpreh se për një protestë që do të zhvillohet për problemet e qytetarëve, nuk është e nevojshme të bëhet konsultim për datën apo formën sesi do të bëhet.

Ndër të tjera, Boçi u shpreh se nuk pretendohet që në protestë, të hyhet brenda perimetrit të sigurisë.

“Nuk ka mungesë. Ka një sinqeritet komunikues në këtë rast. Kur akuzohesh për organizim politik, atëherë fillon bën marëveshje me aleatët, thërret aleatët. Kur konsideron që protesta është qytetare, ti bën thirrjet si forcë politike dhe konsiderohet si një forcë opozitare. Nuk di që ka konsultime për datën dhe për formatin e protestës. Në këtë rast, besoj se mjafton vërtetësia që unë përcjell. Kur thirrja është për qytetarët, çdo reagim, nuk do të thotë që do të jetë brenda kostumit politik.

Në momentin që ti ke arsye si qytetar për thirrjen dhe qënien në protestë, besoj se nuk ka asnjë lloj pengese marrëveshjeje, formalizimi, sepse ne e kemi deklaruar, është stinë protestash. Ne nuk kemi pretenduar që të hyjmë në perimetrin e sigurisë, është një përgjigje paksa hileqare, ndërton këtë lloj imazhi sikur ne duam të hyjmë në perimetrin e sigurisë. Kemi kërkuar protestë në bulevard. Perimetri i sigurisë vendoset edhe nga reagimi qytetar, nuk mund të bëhet fakt i kryer”, theksoi ai.

LEXONI GJITHASHTU

• Protestë në ditën e Samitit, Boçi: Shqiptarët do dalin për problemet e tyre
• ‘Ndotësi më i madh i fjalës’, Boçi: Gjuha banale në Kuvend e iniciuar nga Rama
• Ligji i lustracionit, Koçi: Mbeten për t’u diskutuar nga ana teknike propozimet e PD