Parlamenti Europian pro hapjes së negociatave të Shqipërisë me BE-në

Komiteti i Punëve të Jashtme i Parlamentit Europian mbështet hapjen e negociatave të Shqipërisë me BE-në.

Komiteti votoi me 66 vota pro, 4 kundër dhe 3 abstenime progres-raportin e Isabel Santos mbi vlerësimin e Komisionit Europian për progresin e Shqipërisë në integrimin europian gjatë vitit 2021, të mërkurën.

Në raport, eurodeputetët vlerësojnë angazhimin e Shqipërisë për integrimin europian dhe shprehin mbështetje të qartë për transformimin demokratik të vendit dhe aspiratën për anëtarësim në BE.

Ata shprehën keqardhje për dështimin e hapjes së negociatave të vonuara të anëtarësimit me Shqipërinë dhe Maqedoninë e Veriut, duke theksuar solidaritetin dhe simpatinë e plotë me qytetarët e këtyre vendeve. Ata theksojnë se të dyja vendet kanë plotësuar kushtet e vendosura nga Këshilli Evropian.

Duke vlerësuar vazhdimësinë e Shqipërisë si “një partner i besueshëm dhe i përkushtuar i politikës së jashtme, plotësisht në përputhje me politikën e jashtme, të sigurisë dhe të mbrojtjes së BE-së”, raporti Santos i bën thirrje BE-së të vlerësojë në mënyrë kritike “Implikimet historike të rëndësishme të sigurisë për stabilitetin dhe unitetin në kontinentin evropian dhe në Ballkani Perëndimor në kontekstin e agresionit rus kundër Ukrainës”.

Ajo u kërkon vendeve anëtare të demonstrojnë unitetin evropian duke nisur zyrtarisht negociatat e anëtarësimit me Maqedoninë e Veriut dhe Shqipërinë, duke marrë parasysh si implikimet gjeopolitike të vendimit ashtu edhe përmbushjen e kritereve zyrtare nga të dy vendet.

Eurodeputetët kanë edhe disa kërkesa për Shqipërinë; i kërkojnë vendit tonë të vazhdojë dhe të intensifikojë përpjekjet e saj për të forcuar  gjyqësorin, për të forcuar demokracinë, shtetin e së drejtës dhe ekonominë. Shqipërisë i kërkohet edhe të fuqizojë shoqërinë civile, të luftojë korrupsionin dhe krimin e organizuar, të sigurojë lirinë e medias dhe të garantojë mbrojtjen e të drejtave të pakicave, duke përfshirë komunitetin LGBTQI.