Rreth 3600 infermierë kanë lënë Shqipërinë në tre vitet e fundit. Të dhënat i bëri publike për Euronews Albania kryetar i Sindikatës së Infermierëve, Sabri Skënderi i cili renditi dhe arsyet pse ikin.
“ Kur i pyet pse doni që të ikni ju jashtë Shqipërie, ata thonë: Nuk mund të jetojmë. Ne kemi frikë të bëjmë një fëmijë, të krijojmë një familje. Të kemi një të ardhme, sepse nuk e mbajmë dot”-tha Skënderi.
Pagat e ulëta dhe mungesa e kushteve në punë janë shqetësimet kryesore të kësaj kategorie të punonjësve të kujdesit shëndetësor.
“Infermierët shqiptarë marrin sot 150 euro më pak se infermierët në Kosovë sot, dhe 150 euro më pak se infermierët në Maqedoninë e Veriut dhe në Mal të Zi. Mungojnë mjetet e punës, mungojnë veshjet, mungojnë mjetet mbrojtëse, mungojnë ambientet higjienike, mungon uji i pijshëm në vendin e punës”- shtoi ai.
Sa për infermierët e rinj iu duhet të presin kur të dalin në pension të vjetrit që të punësohen.
“Për 15 vite nuk kemi asnjë rritje të numrit të infermierëve, por janë po ato vende pune që kanë qenë para 15 vjetësh”- theksoi kreu i Sindikatës së Infermierëve.
Sipas Skënderajt, trendi i largimit të infermierëve shqiptarë shënon rritje nga viti në vit. Me këtë ritëm të lartë largimesh, Shqipëria një ditë rrezikon të mbetet pa infermierë.
