Vritet në atentat Gilmando Dani, krahu i djathtë i Shullazit sapo u kthye nga Spanja

Gazetarja e Euronews Albania Sara Demushi bëri me dije se në vendin e atentatit janë gjetur mbi 50 gëzhoje arme kallashnikov, të cilat janë zbrazur me breshëri nga të paktën 3 armë.

Rreth 40 minuta pas atentatit policia gjeti të djegur automjetin e autorëve në fshatin Halil të Fushë-Krujës dhe brenda tij 4 armë; 3 kallashnikovë dhe 1 pistoletë që dyshohet janë përdorur në ekzekutimin e Danit.

Automjeti me të cilin udhëtonte viktima e atentatit në Rinas, Gilmando Dani, krahu i djathtë i Emiljano Shullazit dhe miku i tij shofer, Muçi Shaljani alias Sheqeri i cili ndodhet në gjendje të rëndë shëndetësore është hequr nga vendngjarja në orët e mbrëmjes së të martës.

Automjeti me targa AB 099UO, ka rezultuar në pronësi të E.K, të cilit disa muaj më parë i është vendosur një tritol në garazhin në Tiranë.

17:38 – Autori doli nga makina dhe i qëlloi nga afër| Zbardhet dinamika e atentatit në Rinas

Makina e autorit dhe e viktimave kanë lëvizur për disa sekonda paralel me njëra-tjetrën teksa autorët kanë qëlluar me breshëri plumbash.

Në një moment, mjeti tip “Benz” ka humbur kontrollin si pasojë e të shtënave dhe në vend që të bënte rrethrrotullimin ka ecur drejt.

Në atë moment, një nga autorët, i maskuar, ka dalë nga makina, është afruar afër dhe pasi ka hapur derën e pasagjerit ku ndodhej Gilmando Dani ka qëlluar disa herë.

17:22 – Mbeti i plagosur te atentati në Rinas, si është gjendja e 40-vjeçarit Muçi Shaljani

Euronews Albania ka kontaktuar burime nga Spitali i Traumës në Tiranë për të marrë informacionet më të fundit rreth gjendjes shëndetësore të të plagosurit në atentatin e Rinasit, Muçi Shaljani (Sheqeri).

Sipas burimeve nga spitali, gjendja e 40-vjeçarit mbetet e rëndë, ndërsa ai është nën kujdesin intensiv të ekipit mjekësor.

Pas konstatimit të një automjeti të djegur në fshatin Halil të Fushë-Krujës policia ka shkuar në vendin e ngjarjes ku ka gjetur brenda këtij mjeti 4 armë zjarri që dyshohet se janë përdorur në atentatin e Rinasit.

16:53 – U plagos në atentatin ku u vra Gilmando Dani, publikohet fotoja e agjentit të AMP

Euronews Albania ka siguruar foton e Muçi Shaljani Sheqeri 40 vjeç, i cili mbeti i plagosur në atentatin e ndodhur ditën e sotme te rrethrrotullimi  i Rinasit ku humbi jetën Gilamando Dani, miku i Emiljano Shullazit.

Muçi Shaljani ndodhet në spitalin e Traumës në gjendje kritike për jetën pasi është qëlluar dhe në kokë dhe ka dëmtime të rënda të trurit.

16:35 – Atentati në Rinas: Të shtënat vijuan mbi 30 sekonda, plumbat depërtuan në biznese

Viktima dhe i plagosuri mësohet se ishin larguar drejt Spanjës më datë 7 nëntor dhe u kthyen në Shqipëri të martën, më 11 nëntor, në orën 14:00.

Burime për Euronews Albania bëjnë me dije se automjeti me të cilin lëviznin viktima dhe i plagosuri nuk ishte i blinduar dhe xhamat ishin me qese plastmase që nuk thyheshin.

15:49 – U qëllua me breshëri plumbash, detaje: Viktima sapo mbërriti nga Barcelona

15:35 – Atentati mafioz ku i vra Gilmando Dani, i plagosuri dyshohet agjent i AMP

Burime për Euronews Albania bëjnë me dije se ka dyshime që personi i plagosur, i cili në momentin e atentat ka qenë në timonin e mjetit të blinduar me të cilin udhëtonte bashkë me viktimën, është një agjent i Agjencisë së Mbikëqyrjes Policore.

Pas atentatit me armë zjarri të ndodhur pasditen e kësa të marte në afërsi të aeroportit të Rinasit, është gjetur një automjet i djegur në fshatin Halil të Fushë-Krujës.

Sipas burimeve nga vendngjarja, mjeti është përfshirë plotësisht nga flakët dhe dyshohet se mund të jetë përdorur nga autorët e atentatit të ndodhur në rrethrrotullimin që të çon drejt terminalit të pasagjerëve në Rinas.

14:56 – Momenti pas atentatit në Rinas, policia thyen xhamin për të nxjerrë personat