Kapiteni i Anglisë, Harry Kane, i është bashkuar kampionit gjerman Bayern Munich në një marrëveshje katërvjeçare, duke i dhënë fund karrierës së tij rekord në Tottenham.
Sulmuesi ka nënshkruar një marrëveshje me vlerë më shumë se 110 milionë euro dhe mund të bëjë debutimin e tij në ndeshjen e Superkupës së Gjermanisë të së shtunës kundër RB Leipzig.
Kane, 30 vjeç, largohet nga Premier League si golashënuesi më i mirë i të gjitha kohërave me 280 gola në 435 paraqitje.
Në një postim në mediat sociale ai tha se “ndjeu se ishte koha për t’u larguar”.
Ai e ka fituar Këpucën e Artë të Premier Ligës tri herë – në 2015-16, 2016-’17 dhe 2020-’21 – dhe me 213 gola nga 320 ndeshje në Ligën e Parë angleze, i nevojiteshin vetëm 48 të tjerë për të thyer rekordin e golave të Alan Shearer në Premier League.
Kane, i cili është golashënuesi më i mirë i të gjitha kohërave të Anglisë me 58 gola në ndeshje ndërkombëtare, nuk ka fituar kurrë një trofe të madh me klubin apo shtetin.
“Jam shumë i lumtur që jam pjesë e FC Bayern tani. Bayern është një nga klubet më të mëdha në botë dhe gjithmonë kam thënë se dua të konkurroj dhe të tregoj veten në nivelin më të lartë gjatë karrierës sime”, tha Kane, i cili do të veshë fanellën me numrin nëntë te Bayern.
